EDITÒ : Una annada especiala

     En setembre 2021, los enfants de Cristian Laus nos leguèron sa bibliotèca. Metèrem tot en seguretat en çò d’un aderent per dire de ganhar de temps e passar l’ivèrn. Amb l’ajuda de Dòna S. Caucanas, anciana directritz dels Archius Departamentals d’Aude, avèm entreprés d’en primièr de reprene lo classament de nòstra bibliotèca, que recebèt aquestas darrièras annadas qualques dons importants. Puèi avèm atacat, a la debuta de l’estiu, la tria e la quotacion del fons Laus e l’amainatjament de nòstras pèças per tot i claure dins las melhoras condicions. Nòstra bibliotèca passarà de 3000 a 6000 volums. Un brave utís que comptam plan metre al servici del trabalh de mediacion al torn de nòstra lenga. Tot aquò nos a menat a batejar nòstra bibliotèca del nom de « Cristian Laus ». E, aprèp sa despartida vint ans fa, d’organizar, amb las associacions ont trabalhèt, una Annada Laus : caduna, per d’accions divèrsas, i evocarà lo trabalh de tota sa vida consagrada a la lenga e la cultura occitanas, e contribuirà a manténer son sovenir. Va sens dire que l’estrena de nòstra bibliotèca, aumentada e classada de nòu, ne serà una de las bèlas: es prevista pel 13 de mai de 2023.

     Una autra causa nos ven portar bravament de pensaments, es la situacion financièra de l’associacion. Aprèp las annadas COVID, ont perdèrem d’activitats que tornèron pas prene fin finala, los comptes 2021 acusan un deficit de 7000€, e nòstras previsions per 2022 riscan d’èsser pièjas encara. Lo reequilibratge de la gestion es pas aisit, serà pas efectiu abans l’an que ven. Lo deficit serà pesuc a digerir… Tanben, sonam a l’ajuda totas las personas que nos pòdon sosténer a nos faire qualque don fiscalament deductible : quin que siá son volum, serà planvengut.

     A part aquò, las animacions de l’estiu foguèron plan nombrosas: Janada, balètis amb l’IEO 81, festenal de Sant-Juèri amb lo COST. Las activitats regularas reprenon a comptar del 12* de setembre al local, puèi, mai tard amb las associacions localas partenàrias (Puòggozon, Lescura, Florentin, Sant-Juèri, quartièr del Bruèlh d’Albi). Las activitats pontualas seràn mai que mai sageladas Annada Laus. Lo vam nos a pas quitats, sèm plan vius! Se los mejans fan un pauc problèma, las idèas mancan pas! Venètz nombroses rejónher la còla del COR!

(*la setmana del 19 de setembre pel talhièr de danças e pel cors de lenga)

Lo burèu del CCOA