Bonjorn a totas e a totes !
La dintrada del CCOA: un novèl despart !
Aprèp un estiu 2021 fòrça actiu pel Centre Cultural Occitan de l’Albigés, tornam començar una sason novèla: l’especificitat d’aicesta serà la presentacion, per poder participar a las activitats, del pass sanitari. Al delà de l’entrava, serà benlèu lo biais, aqueste còp, de poder acabar la sason començada sens empachas!
Ongan, l’associacion decidiguèt de pas far pagar las participacions als talhièrs, per far compés a totes los talhièrs que se son pas tenguts las sasons passadas.
Demandarem doncas sonque l’adesion costumièra al CCOA per se poder marcar a las activitats setmanièras e mesadièras. Aquò empacharà pas cadun d’i apondre un eventual don, per una ajuda al foncionament o tanben als investiments que nos son estats necessaris (mòbles per la bibliotèca e lo centre de ressorgas en particular).
Enfin, los projèctes mancan pas! Avèm ensajat de reportar totas las activitats que se poguèron pas téner: jornada del teatre amator occitan, jornada toponimia occitana, etc. Puèi, la còla trabalha, en partenariat amb l’IEO de Tarn, a l’edicion de libres, revirats o escriches per d’aderent-a-s dins de colleccions novèlas!
Un trabalh de recèrca sus l’occitan dins la Revista de Tarn deuriá nàisser dins l’annada. Totas las personas que vòlon participar, ajudar a aqueles projèctes e/o ne prepausar d’autres son las planvengudas!
Vos esperam nombrosas e nombroses per tornar balhar vida a l’usatge de nòstra lenga!