You are currently viewing La Mandadissa del dimècres 24 de junh

La Mandadissa del dimècres 24 de junh

Bonjorn a totas e a totes !

Aqueste dissabte 27 de junh, se deviá téner la Janada. Vos prepausam doncas una Mandadissa especiala Sant Joan, amb d’extraches de la Janada de 2017 dins aquela video realizada pel festenal en linha Total Festum numeric.

En seguida, traparetz un autre tèxte de l’autor Joan Bodon : «La campana de Sant Joan». Per rampèl, lo CCOA e l’Associacion Breuil – Mazicou – Fontanelles organizan una sortida al país del Drac lo dimenge 5 de julhet. Al programa, passejada lo long de Viaur e lectura de contes a La Calquièra, al país de jos la tèrra, al Porcassés… Se’n seguira un repais a La Ribièra e la visita de l’Ostal Bodon de Crespinh. Pensatz plan a vos marcar alprèp del COR !
 

Per acabar, traparetz doas cançons : «Bèla Sant-Joan s’apròcha…» cantada per Armand Segonds, collectada per Al canton ; e «Medecina» del grop Mauresca que deviá jogar per la Janada de 2020 !

La campana de Sant Joan – Joan Bodon

Bringa, branga ! Bringa, brand ! La campana de sant Joan la sonavan ambe vam las gaitas de sus la torre. Bringa, branga ! Bringa, brand ! Per convertir dins lo sang los erètges albigeses, se sarravan los Francimands. Dins Mirandòl, la fortalesa, se remausavan los pacans. Daissavan l’araire pels camps, prenián las femnas, lo bestial. Dejà sus las parets retronissiá lo cant prigond, lo cant nòstre :
Quand lo boièr ven de laurar,
Planta son agulhada, ò !
Bringa, branga ! Bringa, brand ! rebombissiá la campana. Arribavan los Francimands. Caliá calfar l’òli e l’estam per l’escampar suls gorrimands, crosats darrièr, crosats davant. Se n’escanèron tant e tant. L’aiga de Viaur ne veniá sang. Bringa, branga ! Bringa, brand ! A totes donava vam, la campana de sant Joan !
Dins Mirandòl s’aganiguèt. Manquèt de carn, manquèt de pan. Las femnas diguèron :« Mangem pas, aital morirem primièiras ; quant als dròlles, ne parlem pas, que los trairem a la ribièira. »
E mai los i trasián, la nuèch, de la pus cima de la torre que tresplombava lo Gorg Mastís…
leu vau morir, me portaretz
Al pus fons de la cava, ò !
Sus la plaça de Mirandòl l’avián curada la granda cava. Aquí, cada matin, quatre o cinc vièlhs que se podián pas batre trigossavan los cadavres de la nuèch : de cadavres de femnas mai que mai, Pauras femnas ! Se privavan de mangisca e tombavan d’aganiment per fin que los òmes, encara, poguèssen resistir, per que sus la torre se quilhès lo drapèl d’aur barrelat de sang, gloriós drapèl lengadocian.
Acorreguèron los Francimands. Foguèt una sorna batèsta… Cantavan lo Veni Creator. Mas sabián morir coma cal los òmes de Mirandòl. Cadun voliá traucar la pèl d’un barbarossèl.
E partirem pel Paradis,
Dins lo cèl dels Catares, ò!
Lo cridavan lo nòstre cant, los darrièrs Mirandoleses. Dins la torre del cloquièr s’èran condemnats.
Bringa, branga ! Bringa, brand ! Tiravan sus la campana. Encara sonèt tot lendeman, la campana de Sant Joan. Puèi se calèt. Mas dins la vila i aviá sonque de Francimands.
Lor calguèt una messa grand per sanctificar la victòria. Garniguèron tota la plaça de tendas e de lençòls blancs. Per amortir lo gost del sang cremavan d’encens dins las grasalas.
Lo prèire montèt sul fustam ont avián quilhat un autar. Qualqu’un volguèt sonar la campana : èra lo jorn de Sant Joan. La campana destrantalhada davalèt del campanal. Redolèt suls Francimands. Espotiguèt coma de noses las clòscas de mai d’un gigant. Sus las parets demolidas escabelèt d’aquí a Viaur. Cabussèt dins las aigas negras.

E dempuèi, quand sant Joan torna, mas sant Joan d’après Nadal, la campana del Gorg Mastís sona entrò a l’endeman, tot doçament, a mièg balanç. Tot doçament, a mièg balanç, nos conta las guèrras òrras e las batèstas d’antan, los crosats e los erètges, erètges e Francimands.
Mas uèi qual es que l’escota la campana de Sant Joan ?

>> «Bèla Sant-Joan s’apròcha…» cantada per Armand Segonds <<

Aquela cançon èra cantada pels fuòcs de Sant Joan (radals, joanadas, fenestrets, cabanons…). Aquel jorn, los domestics cambiavan de mèstre en general.
Foguèt collectada per la còla de l’IOA dins l’encastre de l’operacion Al canton.

Puèi, lo grop Mauresca canta « Medecina » :

De masquetas, de pegasolets, de CDs, e de libres novèls son disponibles a la librariá del COR !

Esitetz pas a venir al COR del diluns al divendres entre 15h e 18h !

Nos podètz trapar en linha :

Lettre d’information

Laisser un commentaire