Deschifrar las escrituras ancianas, tal es la tòca de la paleografia. Tròp sovent, malurosament, aquela sciéncia pareis fòra de portada, reservada a d’especialistas amb d’experiéncia qu’arriban la mestrejar qu’a la fin de longas annadas d’estudis. E pasmens, per pervenir a legir los manuscriches dels temps passats, sufís de far pròva de qualques coneissenças, e subretot de constància e de perseverança qu’exigissèm de l’enfant qu’apren a legir. Aprèp aver rampelat las estapas principalas de la naissença de l’escritura e del sistem alfabetic, Sylvie Caucanas, conservatritz generala del patrimòni, mostrarà l’evolucion que coneguèt lo traçat de las letras en Occident, de la carolina a l’umanistica, en passant per l’onciala e la gotica. Aquelas transformacions son pas sens rapòrt amb las modificacions del supòrt de l’escritura (del papirús al pergamin puèi al papièr) e dels utisses de l’escriba (del calam a la pluma d’ausèl), relacion estrecha amb las condicions politicas e economicas del temps.
Sylvie Caucanas, istoriana, arquivista paleografa, e anciana directritz de las archivas departamentalas de Perpinhan e d’Aude, anima un talhièr de paleografia occitana cada 1er divendres del mes al Centre Occitan Rochegude d’Albi.