Tot comencèt a l’auba de l’umanitat…. Que siague païsan de las annadas 30 coma aquì, sindicaliste, petancaire  o afuocat al « body-building »,  lo masclum dintra tard e l’autra espèra…. E lo femnum patìs, en silenci! o a pus pres ….  Aquì un texte de G.P. Sobac, recentament descobert per R.Ginolhac,  que met lo lum sus aquelis rapòrts que son plan urosament en trin de cambiar… Signat: una femna.

                                      LA FEMNA NUDA

E ieu t’espèri, me lèvi a cada bruch qu’ausissi pel camin, soi aquì a me gresilhar la sang. Aquela fièira s’es tenguda fins la negra nuèch? O te sias arrestat pels camins?

O t’ausissi de rèsta. Per imatginar de  contes, crenhes pas diguns. Te serias degut far jornalista. I aurias reüssit.

Mas o sabi, ieu, çò qu’as fach!  As passada la vesprada amb una femna!

Una femna nuda! Tot lo vèspre amb una femna que vei tres òmes lo matin, quatre l’après dinnar e cinc la nuèch. D’aquèl temps ta femna se desconsola. Sortìs pas de la cosina. Sonque per donar a las polas e als lapins. Un caud lapin que me fas!  L’òma va a la fièra juste per veire lo prètz dels vedèls e passa quatre oras amb una femna nuda.  A! que non! Monsur èra amb una femna nuda!

As metut una capòta al mens? Veiretz que l’aurà estripada, maladrech coma es! E ara me pòrta totas las malautias del monde. La pissarèla, la cagarèla, la mortadèla! Pòdes ben rire! Benlèu creses que sabi pas çò qu’es la mortadèla?

A! quinas piòtas sèm! E ieu mai que las autras.   Es pas de creire cossi un òme pòt èsser michant de pensar qu’a  el. Aquelas mans sus ièu! Aquelas mans que venon de ne calinhar una autra!

De que pòrtas aqui? Aquela boèta? Lo demai de las capòtas pel còp que ven? Passa lo vèspre amb una femna nuda e me pòrtas aquò per me far biscar!

O! quin polit colièr! I as pensat! E ieu que cresiai… O! mon petiton! mon bèl passeron d’aur! Seràs totjorn un bèl calinhaire! Vau cambiar de rauba per veire cossi me va. O puslèu non. La sopa pòt esperar.