Rambalhs de confinhal

Quand me retirèri, qualques ans fa ara, m’èri dich que me fariá ben de contunhar de trabalhar un bocin, qualquas setmanas aquí, qualquas setmanas ailà ; primièr per çò qu’aimi mon trabalh de fisioterapèuta*, e que me fa plaser d’ajudar un pauc a tirar lo monde d’en pena ; puèi, e o aviái experimentat del temps qu’èri en activitat dins Lauragués, me donava l’escasença de parlar occitan ambe ‘ls locutors usatgièrs que demòran encara, o ambe d’autres, sovent patòlas dins lor parlar- mas que, la lor volontat de respondre un pichon quicòm en òc, me rescalfava lo còr e me tornava donar lo vam que sovent s’escantís. Sustot qu’aquí, se parlava pas dins la lenga per parlar sus la lenga, mas… d’una esquina que dòl, d’una camba que vòl pas córre, d’una espatla reguèrga per far montar lo braç o que te sabi mai… e de totas las causas de la vida dels cada-jorns…

Remplaçavi donc, de temps en quora, de collègas que volián prene qualque congèt… E aquí qu’arribèt la marrana…

Coma aviái promés, al mes d’agost passat, siague a Cadalèn, siague dins Segalar, i me caliá anar…. La masqueta tot lo sant clame del jorn, doblidar pas de netejar aquò e aquò… M’aprenguèt tanben una causa que i aviái pas perpensat de per abans ; me mainèri del cas que fasiái de la mina del monde quand lor torcejavi la cavilha, o lor fasiái plegar lo genolh. Ambe’l morrial , ara, podián ben rebussar lo nas o sarrar los pòts, sens dire res, coma fan los timides o los fièrs que vòlon pas que siague lo dich. Per saupre se, per cas,lor fasiái mal, me caliá acontentar de legir l’expression sus la sola mitat superiora de la cara….

Puèi, de còps, quand caliá anar dins un ostal de retirada :

• Picar un còde sul tablinèl digital, qu’aquò durbís lo portal del parcatge
•  Dintrar per una pòrta de darrèr per s’anar cambiar dins la sala de pregària venguda vestiari ; se lavar las mans, causir un morrial segon l’activitat prevista e…..causir una blòda e unas cauças netas, pindoladas a de cintres ( que, en tornant sortir, cal tot metre dins una guirba per esser lavat) ; alara , per la blòda, rai ! consí que siague , fa l’afar..mas per las cauças, aquò’s quicòm mai, non pas per la longor- los cambals se reboissan- mas per la talha- quand la màger del personal son de femnòtas linjas coma d’estelons, ni per dintrar lo ventre, sarrar las patèrlas, vai te’n trapar lèu fach quicòm que t’angue…

          Aquel afar de reglat, cal prene la temperatura a l’infirmariá….

Un jorn qu’aviái doblidat e que fasiái marchar, en la tenent, una menina pel corredor, te sentissi qualqu’un m’arribar darrèr , a l’escorsa…. « Avètz pas presa la temperatura ! » te me fa l’infirmièira en m’ afustant de luènh ambe son pistolet…- termometre . E la menina, espaurugada « Quitessètz pas de me téner ! Me vau desplombar ! »

E, en decembre, s’èran enregdesidas un pauc mai las reglas…. 
___________________________

* fisioterapèuta = quinesiterapèuta..la forma amb « kiné » es emplegada pas qu’en francés, totas las autras lengas latinas (e tanben l’inglés e l’alemand) utilisan de formas a partir de « fisio ».